30. Mai 2012, von Nadja

Uf dr Pirsch…

Guete Tag,

 

Uf dr Pirsch

mi Name isch Miezi, Büssä, Mauzi, Knudi oder süsch öppis… Irgendwie hei mini liebe

Äupler no ke Ahnig, wie si mir wei sägä u probiere eifach so chli aus us. Aber äs nützt nüt, i mache sowieso wasi wott. Obwou für so chli Stricheleinheite chumeni geng sofort. Cleo würd mer schono passe, das tönt no schpezieu. U schpezieu, das bini, gloubet mers!

 

I bi no nid so lang hie, aber i ha scho mis eigete Revier! Jede Tag entdeckeni Nöis. Schlafe tueni im Heu, wöu ids Huus darfi nid. Das hani glehrt! Einisch isch nämlech ä Tüür offe gsi u i ha so chli ine glüüslet. Fein hets gschmöckt, grad wie die Schinti woni mängisch zum Znacht überchume! I ha du gad eis äs paar Schrittli iche gmacht – natürlech scho nume chlini. Aber ja, da isch du dä gross Maa cho mit dä wiisse Chleider u het mit bösem Blick gseit, dasi sofort use söu. Ui, da bini erchlüpft u ha schnäu wöue flieh. Aber uf däm blöde nasse Züg isches so glatt gsi, dasi geng ufem Buuch bi glägä. Das macheni afe nümm!

 

Mängisch vermisseni mini andere Kolleginne vom aute Ort. De gani aube chli zu dene roserote Grunzine u rede mit dene. Die hei sogar Näme! Eine heisst Pöili, dä hani am liebschte.

Süsch gani chli uf Wanderschafte. Geng seit mer dr gross wiis Maa, i söu Müüs näh. Aber was isch äch das? I tue lieber dene luschtige, farbige Flatterdinger nachejage. Mängisch we dr Maa u d Frou mit dä Gummistifu gö go loufe, gani o gad mit. De säge si geng, i sig fasch wine Hund. U was söu äch das si?

 

So, itz gani chli go pfuuse, dasi när ume fit bi für mini nächschte Abentüür!

 

Ein kleiner Bericht aus Sicht der Katze hier bei uns. Liebe Blogleser/innen, herzlichen Dank für Ihre Namensvorschläge beim vorherigen Bericht. Wir konnten uns noch nicht ganz einigen und werden Ihnen natürlich bald mitteilen, wie die Katze nun heisst. Nächste Woche erhalten Sie Einblick in die Käseproduktion!

Nadja

wunderschöni Tierli

Kategorien: Blog Site Alp | 5 Kommentare

Kommentare (5)

  1. hoi Nadja! go jetz aube ou diner Alpgschichte go läse, wenni bi däm schöne Wätter im Büro hocke =(!ar Pfingste si mir bim Stockhorn gsi u dört hani a di dänkt, chöme nech de uf au fäu mou cho bsueche uf dr sitealp! liebs grüessli

  2. hallo bettina!
    das fröit mi natürlech. si öppe geng da. :-)
    machs guet u nid z schträng im büro!
    lg nadja

  3. :-D

  4. hoi nadja
    mit baby uf em arm gniesse i dini gschichte!
    eso e richtige sennename wie heidi würd doch usgezeichnet zu öire mizze passe. mi dünkt eifach, dass dä gross wiss maa scho chly sträng isch zum büsi :-).
    härzlechi grüess
    mone

  5. uhuu haha i bi fasch achä woni dä iitrag ha gläsä! Gsehs gad biudlech vor mir wi simon reagiert wo si isch ichä cho… u när chaner de sicher glich ni richtig bös si..:D Hätt ono ä idee fürnä Namä: zb. Marti! gruess o a simon hdgfg bisou dis schwöschterli